अल नासरको जितमा रोनाल्डोकाे ह्याट्रिक
एजेन्सी । पोर्चुगिज स्टार क्रिस्टियानो रोनाल्डोको ह्याट्रिकमा साउदी प्रो लिग फुटबलमा अल नासरले उत्कृष्ट जित निकालेको छ । गएराति सम्पन्न खेलमा दमाक एफसीविरुद्ध अल नासरले ३–० को जित निकालेको हो ।
अल नासरको जितमा रोनाल्डोले ह्याट्रिक गरे । उनले खेलको १८ औं मिनेटमा पेनाल्टी गोलमार्फत अल नासरलाई सुरुआती अग्रता दिलाए । उनले नै २३ औं मिनेटमा व्यक्तिगत दोस्रो गोल गर्दै अल नासरलाई २–० ले अगाडि बढाए ।
४४ औं मिनेटमा रोनाल्डोले ह्याट्रिक पूरा गर्दै अल नासरलाई सानदार जित दिलाए । यो जितपछि शीर्ष स्थानको अल नासरले दोस्रो स्थानको अल इत्तिहाद एफसीसँगको दूरी २ अंकले बढाएको छ ।
अहिलेसम्म अल नासरले १८ खेलबाट ४३ अंक जोडेको छ । १८ खेल नै खेलेको अल इत्तिहादको ४१ अंक रहेको छ ।
