हात्तिसुडेमा मोटरसाइकलले पैदल यात्रुलाई ठक्कर, एक जनाको मृत्यु
मकवानपुर — बकैया गाउँपालिका–३ हात्तिसुडेमा मोटरसाइकलले पैदल यात्रुलाई ठक्कर दिँदा एक जनाको मृत्यु भएको छ।
मदन भण्डारी लोकमार्गमा मंगलबार साँझ करिब ५:५० बजे हेटौंडाबाट फापरबारीतर्फ जाँदै गरेको बा ५८ प ३३१८ नम्बरको मोटरसाइकलले बाटोमा हिँडिरहेका ७१ वर्षीय खडकबहादुर घलानलाई ठक्कर दिएको प्रहरीले जनाएको छ।
ठक्करबाट टाउको र अनुहारमा चोट लागेका घलानलाई स्थानीयले तुरुन्तै उपचारका लागि हेटौंडा चुरेहिल अस्पताल पुर्याएका थिए। तर उपचारको क्रममा साँझ करिब ७:४५ बजे चिकित्सकले उनलाई मृत घोषणा गरेका छन्।
मोटरसाइकल चालक २५ वर्षीय देवराज बिक, बकैया–७ निवासी, र पछाडि सवार २० वर्षीय देवराज धानुकी, बागमती गाउँपालिका–६ निवासी, दुबै जना सामान्य रूपमा घाइते भएका छन्। उनीहरूको हात्तिसुडे मेडिकलमा उपचारपछि डिस्चार्ज गरिएको प्रहरीले जनाएको छ।
दुर्घटनामा संलग्न मोटरसाइकल र चालकलाई प्रहरीले नियन्त्रणमा लिई आवश्यक कारबाहीका लागि जिल्ला प्रहरी कार्यालय मकवानपुर पठाएको छ।
घटनाको अनुसन्धान जारी रहेको हात्तिसुडे प्रहरी चौकीले जनाएको छ।