नयाँ वर्षमा हेटौँडामा खुला दौड : बकैयाका राजकुमार गोले प्रथम
मकवानपुर – नयाँ वर्षको अवसरमा नेपाल तरुण दल हेटौँडा उपमहानगरपालिका–६ नं वडा समितिद्वारा आयोजित ५ किलोमिटर खुला दौड प्रतियोगितामा मकवानपुरको बकैया गाउँपालिकाका राजकुमार गोले प्रथम भएका छन्।
प्रतियोगितामा बकैयाकै अनिष थिङ दोस्रो र राक्सिराङका सुभाष हेमजंग तेस्रो भए। प्रथम, द्वितीय र तृतीय हुने खेलाडीहरूले क्रमशः नगद १५ हजार, १० हजार र ५ हजार रुपैयाँसहित मेडल र प्रमाणपत्र प्राप्त गरेका छन्।महिला तर्फ हेटौँडा–१३ की साधना लोप्चन प्रथम, सोही स्थानकी गंगा मोक्तान द्वितीय र हेटौँडा–३ की स्वस्तिका थिङ तृतीय भएका छन्।
नेपाली कांग्रेस मकवानपुरका जिल्ला सभापति बुद्ध लामा प्रमुख अतिथि रहनुभएको उक्त कार्यक्रममा नेपाल तरुण दलका जिल्ला सदस्य राजकुमार बास्तोलाको सभापतित्व रहेको थियो।
प्रतियोगितामा ४ जना महिलासहित ३० जनाको सहभागिता रहेको आयोजकले जनाएको छ। नेपाल तरुण दलले नयाँ वर्षको अवसरमा हरेक वर्ष खुला दौड प्रतियोगिता आयोजना गर्दै आएको छ।