वातावरण दिवसको अवसरमा खुल्ला कविता प्रतियोगितामा राना प्रथम

मकवानपुर । हेटौंडामा पर्यावरण सम्बन्धी खुला कविता प्रतियोगिता सम्पन्न भएको छ । विश्व वातावरण दिवस– २०८० को अवसरमा टोल विकास संस्था नगर समन्वय समिति, हेटौंडा उपमहानगरपालिकाद्वारा आयोजित साताव्यापी कार्यक्रम अन्तरगत बुधबार उक्त प्रतियोगिता सम्पन्न भएको हो ।

सर्जक सञ्जाल मकवानपुरको संयोजन तथा व्यवस्थापन सञ्चालित प्रतियोगितामा ३३ जना कविहरूले कविता बाचन गरेका थिए ।

प्रतियोगितामा रिजन राना प्रथम, किशन पौडेल द्वितिय, बैकुन्ठ लामिछाने तृतिय, ईश्वर थापा र स्वस्तिका बानियाँ सान्त्वना भएका छन् ।
विजेताहरूलाई क्रमशः १५ हजार, १० हजार, ७५ सय र ५/५ हजार रुपैयाँ नगद पुरस्कारसहित प्रमाणपत्र विश्व वातावरण दिवसको समापन कार्यक्रमका दिन प्रदान गरिने आयोजकले जनाएको छ ।

कार्यक्रम टोल विकास संस्था नगर समन्वय समितिका अध्यक्ष ध्रुव प्रसाद अधिकारीको अध्यक्षता तथा हेटौंडा उपमहानगरपालिका वडा नम्बर ४ का वडाध्यक्ष नविन सिग्देलको प्रमुख आतिथ्यतामा भएको हो ।

कार्यक्रममा हेटौंडा उपमहानगरपालिका न्यायिक समितिका सदस्य एवम् समितिका सल्लाहकार ज्ञानबहादुर थापा, सर्जक संजाल मकवानपुरका संयोजक निमेष निखिल, समाजसेवी मुक्ति गोविन्द वैध्य, प्रगतिशिल लेखक संघका केन्द्रिय सदस्य मसान उपासक, नेपाली लेखक संघका छवि अनित्य, साहित्य संगम मकवानपुरका सानु खनाल, मातृभूमि साहित्य समाजका माधव पोखरेल, गजल मंच मकवानपुरका संजित श्रेष्ठ, पत्रकार सुरेश श्रेष्ठ, समितिका सल्लाहकार श्याम प्रसाद श्रेष्ठ, गणेश कुमार श्रेष्ठ, कविहरू दिपक गौतम, शान्ति प्रिय बन्दना, श्याम कुमार बानियाँ लगायत विभिन्न संघसंस्थाका प्रतिनिधिहरूको उपस्थिति रहेको थियो ।