माेरङमा बम विस्फाेट
मोरङको मिक्लाजुङ गाँउपालिकामा बुधबार मध्यरात विष्फोट भएको बताइएको छ ।
जिल्ला प्रहरी कार्यालय मोरङका प्रवक्ता एवं प्रहरी नायब उपरीक्षक दिपक श्रेष्ठका अनुसार भौगोलिक रूपमा अति विकट रहेको गाउँपालिका १ मा विस्फाेटकाे आवाज सुनिएको हो ।
सोही गाँउपालिकाको बर्खेमा बिहीबार बिहानीपख बमजस्तो शंकास्पद वस्तुसमेत फेला परेको प्रवक्ता श्रेष्ठले जानकारी दिए ।
प्रहरीको प्रारम्भिक अनुसन्धानका क्रममा सोही स्थानमा राति बम विष्फोट गराइएको हो। स्थानीय सरस्वती आधारभूत विद्यालय नजिकको क्षेत्रमा प्रेसर कुकर भेटिएको प्रहरी प्रवक्ता श्रेष्ठले जानकारी दिए ।
विद्यालयबाट करिब ४० मिटरको दुरीमा प्रेसर कुकरमा खतरा संकेतसहित विद्युतीय तारहरू निकालिएको अवस्थामा सडकमा भेटिएको उनको भनाइ छ ।
घटनास्थललाई घेरबार गरी सुरक्षित राखिएको र नेपाली सेनाको बम निष्क्रिय टोली त्यसतर्फ जाँदै गरेको बताइएको छ । विद्यालयका शिक्षक मदन श्रेष्ठले सडकमा बेवारिसे अवस्थामा प्रेसर कुकर भेटिएपछि प्रहरीलाई खबर गरिएको बताए ।
श्रेष्ठले राति करिब ११ देखि १२ बजेको समयमय ठूलो आवाजसहित विष्फोट भएको आवाज सुनिएको जानकारी दिए । प्रहरीका अनुसार शंकास्पद वस्तु भेटिएको स्थान मिक्लाजुङको रमितेबाट करिब १२ किलोमिटर पूर्व र उर्लाबारीबाट लगभग ३२ किलोमिटर उत्तरमा पर्छ ।
