प्युटारमा बृहत् धर्म–देशना कार्यक्रम सम्पन्न

ललितपुर – ललितपुरको बागमती गाउँपालिका–४, प्युटारमा मंसिर १३ गते शनिबार बौद्ध शिक्षा विस्तार मैत्री धर्म द्वीप केन्द्र र तामाङ समाजको संयुक्त आयोजनामा बृहत् धर्म–देशना कार्यक्रम सम्पन्न भएको छ। प्युटार–थाङसिङटारमा गरिएको कार्यक्रम स्थानीय समुदायदेखि भिक्षु–भिक्षुणी, धार्मिक संस्था तथा युवाको समेत उल्लेख्य सहभागितामा सम्पन्न भएको आयोजकले जानकारी दिएको छ।

कार्यक्रमका मुख्य आकर्षण परम पूज्यनीय धर्मगुरु जेचुन साङ्ग्ये खाण्डो रिन्पोछे ज्यूको विशेष उपस्थिति रहेको थियो। रिन्पोछे ज्यूले मैत्री, करुणा, सत्य मार्ग र आध्यात्मिक अनुशासनका विषयमा महत्वपूर्ण बौद्ध उपदेश राख्दै समाजलाई सदाचार, सद्भाव र सकारात्मक जीवनदृष्टिकोण अपनाउन प्रेरित गरेका थिए। उहाँको उपदेशले सयौँ भक्तजनमा आध्यात्मिक उत्साह र उमङ्ग थपिएको सहभागीहरूले बताएका छन्।

हरियाली पहाडले घेरिएको रमणीय वातावरण, बगिरहेको बागमती नदी, ऐतिहासिक मामथान डाँडा, महा माता देवी थानी, कालेश्रोर मन्दिर लगायतका स्थलका कारण प्युटार धार्मिक तथा सांस्कृतिक पर्यटनका निम्ति आकर्षक गन्तव्य बन्दै गएको स्थानीयको अभिमत छ।

प्युटार क्षेत्रमा पालिका स्तरीय अस्पताल, विद्यालय, कलेज, गुफा–डाँडा र अन्य संरचनाहरू पनि क्रमशः विकास हुँदै गइरहेका छन्। कार्यक्रमले धार्मिक शिक्षा, आध्यात्मिक चेतना, ध्यान अभ्यास, पुण्य सञ्चय तथा समाजमा धर्मको सकारात्मक प्रभावबारे विस्तृत छलफल गरेको आयोजक संस्थाले जनाएको छ।

कार्यक्रम सफल बनाउन योगदान गर्ने स्थानीय प्रतिनिधि, स्वयम्सेवक, सञ्चारकर्मी तथा समुदायका सबै व्यक्तिहरूलाई आयोजक संस्थाले धन्यवाद प्रकट गरेको छ।