जमुनाहा नाका आज र भोलि बन्द
बकैया दर्पण : बाँकेको नेपाल-भारत जमुनाहा नाका दुई दिनका लागि बन्द भएको छ।
भारतको उत्तरप्रदेश राज्यको बहराइच जिल्लामा हुन लागेको लोकसभा निर्वाचनका लागि सीमानाका गएराति साढे १० बजेदेखि सोमबार ५ बजेसम्मका लागि बन्द गरिएको जिल्ला प्रशासन कार्यालय, बाँकेले जनाएको छ।
खुला सीमाका कारण निर्वाचनको वेला सुरक्षा चुनौतीलाई मध्यनजर गरी भारतीय सुरक्षा निकायबाट पत्राचार भएअनुसार सीमानाका बन्द गरिएको बाँकेका निमित्त प्रमुख जिल्ला अधिकारी जोरासिंह माझीले जानकारी दिए।
नेपाल र भारत दुवै देशमा विभिन्न तहका निर्वाचन हुने समयमा विगतमा पनि सीमा नाका बन्द हुँदै आएका थिए। यसअघि गत साता पनि भारतको बहराइच जिल्लाको बहराइचमा निर्वाचन भएकाले ७२ घण्टाका लागि जमुनाहा नाका बन्द गरिएको थियो।