१ ग्राम ५६० मिलिग्राम खैरो हेरोइनसहित २ जना पक्राउ
मकवानपुर — मकवानपुर प्रहरीले लागूऔषधसहित दुई जनालाई पक्राउ गरेको छ। गत मंसिर १९ गते साँझ करिब ५ बजे प्रहरी चौकी रातोमाटेबाट खटिएको टोलीले हेटौंडा उपमहानगरपालिका–१५ रातोमाटे चेकपोस्टमा गरिएको नियमित चेकजाँचका क्रममा उनीहरूलाई समातेको हो।
बिरगंजबाट हेटौंडातर्फ आइरहेको बा.प्र. ०६–००१ ज ०१९१ नम्बरको EV गाडी चेकजाँच गर्ने क्रममा शंका लागेर प्रहरीले सवार दुई जनाको खानतलासी गर्दा १ ग्राम ५६० मिलिग्राम खैरो हेरोइन जस्तो देखिने पदार्थ फेला परेको प्रहरीले जनाएको छ।
पक्राउ पर्नेमा २३ वर्षका पाल्पा रामपुर–८ का मनिष ठकुरी (स्मारिका) र २५ वर्ष कास्की रुपा–५ का सन्जित नेपाली (रचना) रहेको छ ।
उनीहरूले उक्त पदार्थ लुकाइ–छिपाई राखेको अवस्थामा भेटिएपछि दुवैजनालाई नियन्त्रणमा लिइएको प्रहरीले बताएको छ।
घटनासम्बन्धमा मकवानपुर जिल्ला अदालतबाट म्याद अनुमति लिएर थप अनुसन्धान भइरहेको जिल्ला प्रहरीले जानकारी दिएको छ।