मकवानपुरगढीमा ब्रेक फेल भई बस दुर्घटना: ४ जना घाइते
मकवानपुर – मकवानपुरगढी गाउँपालिका–१ बागधारा स्थित कान्तिलोकपथ सडक खण्डमा आज बिहान भएको बस दुर्घटनामा ४ जना घाइते भएका छन्। बिहान ११:५० बजे फापरबारी बस्तिपुरबाट काठमाडौंतर्फ जाँदै गरेको बा ५ ख २९४ नम्बरको बसको ब्रेक फेल भई अनियन्त्रित रूपमा सडकको बाँया किनारको नालामा कोल्टिएर दुर्घटना भएको प्रहरीले जानकारी दिएको छ। घाइतेमध्ये १ महिला र ३ पुरुष रहेका छन्, जसको नाम–ठेगाना अहिले खुल्न बाँकी छ।

दुर्घटनाको जानकारी पाएपछि इ.प्र.का. ठिंगन मकवानपुरबाट प्र.स.नि. विष्णु दयाल साहको कमान्डमा ४ जनाको टोली र अ.प्र.पोष्ट जितपुरबाट प्र.ह. कुलबहादुर मगरको कमान्डमा २ जनासहित कुल ६ जना प्रहरीले तत्काल उद्धारमा खटिएका थिए। घाइतेहरूलाई उपचारका लागि मकवानपुर सहकारी अस्पतालमा पठाइएको प्रहरीले जनाएको छ ।
बस चालक मकवानपुर, बकैया गाउँपालिका–१०, अम्बासका ३१ वर्षीय गोकुल तिमल्सिनालाई प्रहरीले नियन्त्रणमा लिएको छ। दुर्घटनास्थल इलाका प्रहरी कार्यालय ठिंगनबाट करिब ११ किलोमिटर दक्षिण–पश्चिममा पर्ने जनाएको छ। दुर्घटनाबारे थप अनुसन्धान भइरहेको प्रहरीले जानकारी दिएको छ।
