सिमभन्ज्याङमा ४८ वर्षीय पुरुषको लडेर मृत्यु
मकवानपुर — मकवानपुरको कैलाश गाउँपालिका–५ ठोस्ने घर भई हाल थाहा नगरपालिकामा बस्दै आएका ४८ वर्षीय मानबहादुर जिम्बाको लडेर मृत्यु भएको छ।
घटना मंसिर १२ गते राति करीब १० बजे घटेको थियो। थाहा न.पा.–४ ठुलोमार्खुस्थित ज्ञानमाया लामाको घरमा खेतीपाती गर्दै बस्दै आएका जिम्बा बसिरहेको ठाउँमै एक्कासी लडेर मृत्यु भएको भनी प्राप्त जानकारीका आधारमा मंसिर १३ गते दिउँसो १ बजे प्रहरी चौकी सिमभन्ज्याङमा खबर पुगेपछि प्रहरी टोली घटनास्थलतर्फ खटिएको थियो।
प्र.स.नि. कृष्ण मोहन प्रसाद गुप्ताको कमाण्डमा पुगेको प्रहरी टोलीले घटनास्थल सुरक्षित राखेको थियो। त्यसपछि थप अनुसन्धानका लागि इलाका प्रहरी कार्यालय पालुङबाट प्र.नि. रुक्शा बज्राचार्यको कमाण्डमा सोको टोली खटिइ मुचुल्का लगायतका आवश्यक प्रक्रिया पूरा गरेको प्रहरीले जनाएको छ।
मुचुल्का कार्य सम्पन्न गरी शवलाई पोष्टमार्टमका लागि साँझ ५:२० बजे हेटौडा अस्पताल पठाइएको छ। घटनास्थल प्रहरी चौकी सिमभन्ज्याङबाट करिब ५ किलोमिटर पूर्व र इलाका प्रहरी कार्यालय पालुङबाट करिब १८ किलोमिटर दक्षिण–पूर्व पर्ने जनाइएको छ।
घटनाबारे थप अनुसन्धान भइरहेको प्रहरीले जानकारी दिएको छ।