केन्द्रीय कारागारबाट फरार कैदीले चोरीका मोटरसाइकल बिक्री गर्दाः हेटौंडाबाट १ जना पक्राउ
मकवानपुर – मकवानपुर प्रहरीको टोलीले हेटौंडा उपमहानगरपालिका–७ हरियालीस्थित सडकखण्डबाट चोरी गरी बिक्री गरिएको मोटरसाइकल सहित एक जनालाई पक्राउ गरेको छ।
मंगलबार भएको नियमित चेकजाँचका क्रममा उमाका वडा नं. १५ भोर्ले बस्ने २१ वर्षीय अभिषेक वाइवाले चलाइरहेको बा ४० प ४२९५ नम्बरको मोटरसाइकल रोकेर जाँच गर्दा कागजपत्र नपाइएको प्रहरीले जनाएको छ।
मोटरसाइकल कार्यालयमा ल्याई थप अनुसन्धान गर्दा उक्त बाइक २६ वर्षीय राजेश खातीले बिक्री गरेको तथ्य खुलेको हो। उल्लेखनीय कुरा—राजेश खाती भदौ २३ र २४ गतेको Gen-Z आन्दोलनका क्रममा काठमाडौँको केन्द्रीय कारागार सुन्धाराबाट भागी फरार भएका व्यक्ति हुन्।
हाल पुनः पक्राउ परी कारागारमै रहेका खातीले फरार अवधिमा चोरीका मोटरसाइकल बिक्री गरेको तथ्य बाहिर आएपछि प्रहरीले घटनाबारे थप अनुसन्धान जारी राखेको छ।
प्रहरीका अनुसार पक्राउ परेका अभिषेक वाइवामाथि आवश्यक कानुनी प्रक्रिया अगाडि बढाइनेछ।