हेटौंडा कर्रा चोकमा मोटरसाइकल ठक्करबाट पैदल यात्रीको मृत्यु
मकवानपुर,हेटौंडा । हेटौंडा उपमहानगरपालिका–४ कर्रा चोकमा मोटरसाइकलले पैदल यात्रीलाई ठक्कर दिँदा एक जनाको मृत्यु भएको छ ।
बिहिवार साँझ १८:३० बजे पशुपतिनगरबाट हेटौंडातर्फ आउँदै गरेको ना.३८प ५८५० नम्बरको मोटरसाइकलले पैदल हिँडिरहेकी पर्सा वीरगञ्ज–१६ नागुवा घर भई हाल हेटौंडा–१० कर्रा निवासी ५५ वर्षीया खुइली डोमलाई ठक्कर दिएको प्रहरीले जनाएको छ ।
ठक्करबाट गम्भीर घाइते भएकी डोमलाई १८:४२ बजे हेटौंडा अस्पताल पुर्याइएकोमा उपचारका क्रममा १८:५० बजे उनको मृत्यु भएको अस्पतालले पुष्टि गरेको छ ।
घटनास्थलमा खटिएको प्रहरी टोलीले मोटरसाइकल चालक बाराको सिम्रनगढ नगरपालिका–११ निवासी २५ वर्षीय सुनिल ठाकुरलाई नियन्त्रणमा लिएको जनाएको छ ।
मृतकको शव हेटौंडा अस्पतालमै राखिएको छ भने घटनाबारे थप अनुसन्धान भइरहेको प्रहरीले जानकारी दिएको छ ।