कुलमानलाई हटाएकोमा निन्दा गर्दै प्रचण्डले भने- कथित दुईतिहाइको दम्भमा गरिएको निर्णय

बकैया दर्पण : नेकपा माओवादी केन्द्रका अध्यक्ष पुष्पकमल दाहाल प्रचण्डले नेपाल विद्युत् प्राधिकरणका कार्यकारी निर्देशक कुलमान घिसिङलाई बर्खास्त गरेकोमा सरकारको आलोचना गरेका छन्।

उनले कुलमानलाई बर्खास्त गरेको समाचार विभिन्न सञ्चारमाध्यबाट पाएको आफ्नो सामाजिक सञ्जालमा उल्लेख गर्दै सो समाचार असत्य सावित होस् भन्ने कामना पनि गरेका छन्।

साथै प्रचण्डले आजको मन्त्रिपरिषद बैठकले कुलमानलाई बर्खास्त गरेको भए सरकारको उक्त कदम बिल्कुल गलत र आपत्तिजनक भएको भन्दै भर्त्सनासमेत गरेका छन्।

उनले ‘कथित दुई तिहाई बहुमतको दम्भमा गरिएको यो निर्णयप्रति घोर निन्दा गर्दछु’ भनि सञ्जालमा उल्लेख गरेका छन्।

यस्तो छ सामाजिक सञ्जाल फेसबुकमा प्रचण्डको अभिव्यक्तिः

‘देशमा जनताले चरम लोडसेडिङको मार खेपिरहेका बेला एउटा उर्जा विज्ञका रुपमा मेरो नेतृत्वको सरकारले कुलमान घिसिङलाई विद्युत प्राधिकरणको कार्यकारी निर्देशकमा नियुक्त गरेको हो। उनको विज्ञता र क्षमता अनि हाम्रो नेतृत्वको संयुक्त प्रयासबाट ऊज्यालो नेपाल निर्माण गर्न सफल भएको जन-जनमा जानकारी छ। उनै कुलमान घिसिङलाई बाँकी बक्यौता जनताको पैसा हो उठाउनुपर्छ भनेको कारणले लामो समयदेखि पदबाट हटाउने उद्देश्यका साथ पटक-पटक स्पष्टीकरण सोधेर अन्याय गर्दै आएको थियो तर आज भने सरकारले मन्त्रीपरिषद् बैठकबाट कुलमानलाई बर्खास्त नै गरेको भन्ने खबर संचारमाध्यमबाट थाहा हुन आएको छ, आशा गरौं यो खबर असत्य सावित होस् । यदि सत्य रहेछ भने सरकारको यो कदम बिल्कुल गलत र आपत्तिजनक छ । कथित दुई तिहाई बहुमतको दम्भमा गरिएको यो निर्णयप्रति घोर निन्दा गर्दछु।’