मिटरब्याज पीडितहरू मिटरब्याजविरुद्धको कानुन पारित गर्न माग गर्दै प्रदर्शन
मकवानपुर । मिटरब्याजविरुद्धको कानुन पारित गर्न माग गर्दै मिटरब्याज पीडितहरूले काठमाडौंमा प्रदर्शन गरेका छन् ।
आइतवार काठमाडौंको माइतीघर मण्डलादेखि नयाँ बानेश्वरसम्म मिटरब्याजपीडितहरूले प्रदर्शन गरेका हुन् । मिटरब्याज पीडितको समस्या समाधानका लागि सरकारले २० वैशाखमा ल्याएको मुलुकी संहितासम्बन्धी केही नेपाल ऐनलाई संशोधन गर्ने अध्यादेश २०८० को प्रतिस्थापन विधेयक निष्क्रिय भएको छ ।
संविधानअनुसार अध्यादेश जारी भएको ६० दिनभित्र संसद्बाट पारित नभए निष्क्रिय हुन्छ । कानुन निष्क्रिय भएसँगै मिटरब्याजपीडितहरूले कानुन पारित हुनुपर्ने माग राख्दै प्रदर्शन गरेका हुन् । मिटरब्याज पीडित रेखा साहले तीनवटा पार्टीहरू मिलेर मिटरब्याजविरुद्धको कानुन पारित हुन नदिएको आरोप लगाइन् ।
उनले संसद्बाट मिटरब्याजविरुद्धको कानुन पारित नभएसम्म आन्दोलन जारी राख्ने चेतावनी दिइन् । उनले मिटरब्याज पीडितले न्याय नपाएसम्म सडक आन्दोलन गरिरहने बताइन् ।
उनले नेकपा एमाले, राष्ट्रिय स्वतन्त्र पार्टी र जनता समाजवादी पार्टी, नेपाल गरी तीन पार्टी मिलेर कानुन पास हुन नदिएको आरोप लगाइन् ।
पीडितहरूले सरकारले माग सम्बोधन गर्न छानबिन आयोग बनाएर पनि कारबाही गर्न बनेको कानुन निष्क्रिय भएसँगै मिटरब्याजीहरू चलमलाएको बताए ।
उनीहरूले मिटरब्याजीहरू घरघरमा गएर गाली बेइज्जती गर्न थालेको बताए । पीडितहरूले सरकारले दिएको ललिपपले मान्ने अवस्था नरहेको बताए ।
