पहिरोका कारण कुलेखानी–सिस्नेरी सडकखण्डमा यातायात अवरुद्ध
मकवानपुर । गएराति देखि परेको विरल बर्षासँगै आएकाृ पहिरोका कारण कुलेखानी–सिस्नेरी सडकखण्डमा यातायात अवरुद्ध बनेको छ ।
उक्त सडकखण्ड अन्तरगत पर्ने मकवानपुरको इन्द्रसरोवर गाउँपालिका वडा नम्बर ३ भालुडाँडास्थित पहिरो जाँदा यातायात अवरुद्ध बनेको मकवानपुरका प्रहरी नायव उपरीक्षक टेकबहादुर कार्कीले जानकारी दिए ।
लगातार वर्षाका कारण पहिरो हटाउन कठिनाइ भइरहेको भन्दै प्रहरी नायव उपरीक्षक कार्कीले उक्त सडकखण्ड हुँदै संचालन हुने सवारी साधनहरुलाई बैकल्पिक बाटो प्रयोग गर्न आग्रह गरेका छन् ।
वर्षाका कारण भैंसे–भीमफेदी सडकखण्ड पनि अवरुद्ध बनेको छ । भीमफेदी गाउँपालिका वडा नम्वर २ स्थित ज्यालटारमा माथिबाट लेदो माटोसहितको पहिरो जाँदा भैंसे–भीमफेदी सडकखण्डमा यातायात अवरुद्ध बनेको हो ।
