१ सय ५५ केजी गाँजा र नगद २ लाख रूपैयाँसहित मकवानपुरका युवक पक्राउ
मकवानपुर । मकवानपुरको कैलाश गाउँपालिका वडा नं. १० बस्ने ३२ वर्षीय रामसिंह मोक्तान अवैध लागूऔषध गाँजा र नगदसहित पक्राउ परेका छन् ।
मोक्तान सिन्धुलीको कमलामाई नगरपालिका वडा नं.९ भिमानबाट लागूऔषध गाँजा करिब १ सय ५५ केजी (डेढ क्वीन्टल) र नगद २ लाख रूपैयाँसहित सोमबार पक्राउ परेका हुन् ।
उनलाई विशेष सूचनाको आधारमा ईलाका प्रहरी कार्यालय भिमानबाट खटिएको प्रहरीले पक्राउ गरेको हो ।
प्रहरीका अनुसार, काठमाडौंबाट महोत्तरीतर्फ जाँदै गरेको बा. २० च ९८३ नम्बरको हात्तिगाडीलाई चेकजाँच गर्ने क्रममा गाडीको पछाडी ढालाको तल सेफ बनाई लुकाई छिपाई ल्याएको उक्त परिमाणको गाँजा फेला परेपछि गाडीका चालक मोक्तानलाई पक्राउ गरिएको हो ।
पक्राउ गरेका उनीमाथि आवश्यक अनुसन्धान गरिरहेको जनाइएको छ ।